تبریز امروز:
دیلبرا، دردِ دیلیمدن بئله عونوان ائتدیم،
کی، غمِ هیجریده دیل مولکونو ویران ائتدیم.
مومکون اولماز منه وَصلین، بیلیرم، حَشره کیمی،
اول سبب مسکنیمی کوه و بیابان ائتدیم.
عشق سولطانی منم قتلیمه فرمان گتیریب،
ائتمه‌دیم ترکِ وفا، طاعتِ فرمان ائتدیم.
سر کویونده قویوب باشیمی، بیر اوف دئمه‌دیم،
سرِ صیدق ایله جانیمی قوربان ائتدیم.
یا طبیب، آدینی ترک ائیله، طبابت ائتمه!
یا منیم دردیمی تاپ، گؤر نییه طوغیان ائتدیم.
یوخدو بیر کیمسه مگر دردیمی بیلسین، یا رب!
کی، من اؤز قانیم ایله دردیمه درمان ائتدیم.
دردِ هیجرینده گؤزوم یاشی توتوب دونیانی،
نوح طوفانی کیمی گؤر، نئجه طوفان ائتدیم.
ناتوان، ائتمه‌دی اول سنگدیله ناله اثر،
گئجه – گؤندوز نه قدر ناله و افغان ائتدیم.
خورشیدبانو ناتوان
