تبریز امروز:
تارچالان رامیز قلیف ین تاری الیندن یئره دوشدی. رامیز یئر اوزونده ایلک محبتین سونا چاتدیردی و سون باهارین یارپاقلاری کیمی توپراق لا قوجاقلاشدی!
دونن، آذربایجان موسیقیسی اوزونون ان بؤیوک اولدوزلاریندان بیرینی ایتیردی. بؤیوک استاد، تار سئحرگِری، رامیز قلیف ۷۸ یاشیندا دنیادان ابدی سئحر عالمینه کوچدو. او، هر زَخمهسیله آذربایجان موسیقیسینی دونیادا یاشایان اینسان لارین قَلبینه ده یاشاتدی؛ هر زخمهسی عاشیقلرین و موغامچیلارین روحونو تار تئللرینده یاشادان بیر سس ایدی .
بیر گئجه، اردبیلین، بیرگئجه تبریزین و بیرگئجه تهرانین سمالاری رامیز قلیفین تارینین سسی ایله جانلاندی سئحرلی بیر نغمهیه قولاق آسدی. هر زخمهسی اورهکلری تیترهتدی، گؤزلری گؤز یاشییلا دولدوردو. چون او، یالنیز موسیقی چالميردی – اینسانلارین حسرتلرینی، سئوینجلرینی و آرزولارینی تار تئللرینده اوخویوردو.
رامیز معلم ین پیکری ، فخری مزارلیغیندا، باکینین بولود آغلایشی آلتیندا، سون یولونا اوغورلاندی. عائله سی نین، شاگردلرینین، دوستلارینین و موسیقی عاشیقلرینین گؤزلَرینده آغلایش و اوره ک لرینده سؤزسوز بیر آغری قالدی . تارلار دیوارلاردا آسلانوب، چون رامیزین اللَری آرتیق او سیملره دوشمهیهجَک.رامیز قلیف، تک جه بیر تارچالان دئییلدی – او، بیر مکتب ، بیر چیراغی دی. تار رامیزین الینده سوز دیییردی، آغلایردی، گولوردی... هر زخمهسی بیر داستان، بیر عشق، بیر سئودا ، بیر وطن سئوگیسییدی.
روحو سئوینسین ، روحون شاد اولسون، رامیز معلم!
سنین تارینین سسی، گؤیلرده بیر اولدوز، یئر اوزونده بیر چای کیمی آخاجاق.
نغمهلرینله دونیادا ابدی بیر نغمه اولدون!
توفیق وحیدی آذر
